สพฺพนีลกโอทาตปีตโลหิตกณฺหกา ;
มหารงฺคมหานาม-รงฺครตฺตา จุปาหนาฯ
[177]
สพฺพมญฺเชฏฺฐิกา จิตฺรา, นีลปีตาทิวทฺธิกา;
ติตฺติรปตฺติกา เมณฺฑ-อชวิสาณวทฺธิกาฯ
[178]
ขลฺลพทฺธา ปุฏพทฺธา, ตูลปุณฺณา จุปาหนา;
ปาลิคุณฺฐิมกา โมร-ปิญฺเฉน ปริสิพฺพิตาฯ
[179]
วิจฺฉิกาฬิกตา สีหพฺยคฺฆุทฺทาชินทีปินํ;
มชฺชารกาฬโกลูกจมฺเมหิ จ ปริกฺขฏา;
ปาทุกา สงฺกมนียา, โกจิ ธาเรยฺย ทุกฺกฏํฯ
[180]
นีลาทิวณฺณํ สกลํ, ปุญฺฉิตฺวา เวกเทสกํ;
อุปาหนา วฬญฺเชยฺย, หาเรตฺวา ขลฺลกาทิกนฺติฯ
23. อโนโลกิยนิทฺเทโส
อโนโลกิยนฺติ –
[181]
สารตฺโต อิตฺถิยา โยนิํ, มุขํ วา ภิกฺขทายิยา;
ปรสฺส ปตฺตมุชฺฌานสญฺญี วา อตฺตโน มุขํ;
อาทาโสทกปตฺเต วา, โอโลเกยฺยสฺส ทุกฺกฏนฺติฯ
24. อญฺชนีนิทฺเทโส
อญฺชนีติ –
[182]
วฏฺฏาฏฺฐโสฬสํสา วา, มฏฺฐา วฏฺฏติ อญฺชนี;
ติสฺโสปิ มูเล คีวายํ, เลขา เอกาว พนฺธิตุํฯ
[183]
ยํ กิญฺจิ รูปํ มาลาทิกมฺมํ มกรทนฺตกํ;
โคมุตฺตกฑฺฒจนฺทาทิ-วิการํ เนตฺถ วฏฺฏติฯ
[184]
ลพฺเภกวณฺณสุตฺเตน, สิพฺพิตุํ ถวิกา ตถา;
สิปาฏิ กุญฺจิกาโกโส, สลากาปิ อจิตฺตกาฯ
[185]
สงฺขนาภิวิสาณฏฺฐิ-นฬทนฺตมยา ตถา;
ผลกฏฺฐมยา เวฬุ-ลาขาโลหมยาปิ จฯ
[186]
อญฺชนิโย สลากาโย, ธูมเนตฺตา จ ลพฺภเร;
ตถา สตฺถกทณฺฑานิ, นตฺถุทานา จ ตมฺมยาติฯ
25. อกปฺปิยสยนนิทฺเทโส
อกปฺปิยสยนานีติ –
[187]
อาสนฺที ตูลี ปลฺลงฺโก, ปฏิกํ โคนจิตฺตกํ;
ปฏลี วิกตี อุทฺท-โลมี เอกนฺตโลมิกาฯ
[188]
กุตฺตํ โกเสยฺยํ กฏฺฏิสฺสํ, หตฺถิอสฺสรถตฺถรา;
ชินปฺปเวณิกทลี-มิคปฺปวรอตฺถราฯ
[189]
สโลหิตวิตานญฺจุ-ภโตรตฺตูปธานกํ ;
อกปฺปิยานิ เอตานิ, ทุกฺกฏํ ปริภุญฺชโตฯ
[190]
อาสนฺทาทิตฺตยา เสเส, ลพฺภเต คิหิสนฺตเก;
ธมฺมาสเน จ ภตฺตคฺเค, ฆเร จาปิ นิสีทิตุํ;
ภูมตฺถรณสงฺเขเป, สยิตุญฺจาปิ กปฺปติฯ
[191]
จตุรํสปีฐา สตฺตงฺคา, ปญฺจงฺคา อุจฺจปาทกา;
ตูโลนทฺธา ฆเรเยว, มญฺจปีฐา นิสีทิตุํฯ
[192]
โจฬวากุณฺณปณฺณานํ, ติณานญฺเจว ปูริตา;
จีวรจฺฉวิโย ปญฺจ, ภิสี สพฺพตฺถ กปฺปิยาฯ
[193]
ตูลตฺตยํ ภิสิคพฺโภ, โลมานิ มิคปกฺขินํ;
พิมฺโพหเน อนุญฺญาตํ, ตูลวชฺชา มสูรเกฯ
[194]
มนุสฺสโลมมุณฺณายํ, ปณฺเณ ปุปฺผํ ตมาลกํ;
สุทฺธํ น อาสนญฺเจว, ลพฺภมปฺปฏิเวกฺขิตนฺติฯ